ਚੰਦ ਸਵਾਲ .................

-ਗੁਰਮੀਤ ਸੰਧਾ

ਕਹਿੰਦੇ ਅੱਤਿਆਚਾਰੀ ਰਾਵਣ,
ਦੁਸ਼ਟ ਬੜਾ ਵਿਭਚਾਰੀ ਰਾਵਣ ,
ਪਾਪੀ ਤੇ ਦੁਰਾਚਾਰੀ ਰਾਵਣ ,
... ਨੀਚ ਬੜਾ ਹੰਕਾਰੀ ਰਾਵਣ,
ਅੱਖੀਂ ਘੱਟਾ ਪਾ ਰਾਮ ਦੇ
ਸੀਤਾ ਨਾਰ ਚੁਰਾਈ |

ਇਹ ਸੋਚੋ ਕੋਈ ਯੋਧਾ ਭਾਰੀ,
ਨਿੱਕੀ ਜਿਹਦੀ ਭੈਣ ਪਿਆਰੀ ,
ਲਛਮਣ ਨੂੰ ਆਪਣਾ ਦਿਲ ਹਾਰੀ,
ਉਸਨੇ ਨੱਕ ਵੱਢ ਦੁਰਕਾਰੀ ,
ਭੈਣ ਵਿਲਕਦੀ ਆਈ ਘਰ ਨੂੰ ,
ਕੀਕਣ ਸਹਿੰਦਾ ਭਾਈ ?

ਰਾਵਣ ਰਾਜਾ ਮਹਾਂ ਗਿਆਨੀ ,
ਚਰਿੱਤਰਵਾਨ ਯੋਧਾ ਲਾਸਾਨੀ ,
ਘਰ ਅਤਿ ਸੁੰਦਰ ਗੈਰ ਜਨਾਨੀ ,
ਜੇ ਚਾਹੁੰਦਾ ਕਰਦਾ ਮਨ ਮਾਨੀ ,
ਐਪਰ ਸਬਰ ਦਿਖਾਇਆ ਉਸਨੇ ,
ਸੀਤਾ ਅੰਗ ਨਾ ਲਾਈ |

ਸ੍ਰੀ ਰਾਮ ਨੂੰ ਸੀਤਾ ਪਿਆਰੀ,
ਲਾਜਵੰਤ ਗੁਣਵੰਤੀ ਨਾਰੀ ,
ਅਰਧ ਅੰਗਣੀ ਜਨਕ ਦੁਲਾਰੀ ,
ਜਦੋਂ ਕਿਸੇ ਨੇ ਬੋਲੀ ਮਾਰੀ,
ਬਿਨਾ ਕਸੂਰੋਂ ਤਿਆਗ ਕਾਸਨੂੰ ,
ਰਾਹ ਜੰਗਲ ਦੇ ਪਾਈ ?

ਰਾਮ ਪਿਆਰੇ ਅੰਤਰਜਾਮੀ ,
ਘਟ ਘਟ ਜਾਨਣਹਰ ਸਵਾਮੀ ,
ਦੁਨੀਆਂ ਲੱਖ ਕਰੇ ਬਦਨਾਮੀ ,
ਕਿਓਂ ਸੀਤਾ ਦੀ ਭਰੀ ਨਾ ਹਾਮੀ ,
ਅਗਨ ਪ੍ਰੀਖਿਆ ਮੰਗ ਓਸ੍ਤੋੰ ,
ਕਿਓਂ ਕੀਤੀ ਰੁਸਵਾਈ ?

********